Турсункулова: Кыргызстанда 617 000 адам кант диабети менен жабыркайт
Кант диабети тез көбөйүп жаткан илдеттердин катарына кирет. Учурда өлкөдө аталган ооруга чалдыккан 617 миң адам бар. Бул тууралуу Гүлжамал Турсункулова Sputnik Кыргызстан радиосунун эфиринде маек куруп жатып билдирди.
Анын айтымында, аталган илдет тукум кууйт. Эгер ата-энеси экөө тең кант диабетинен жабыркаса, балдары да тубаса бул дарт менен төрөлөт.
"Кант диабети дүйнө жүзү боюнча кескин өсүп жаткандыгы байкалат. Ал негизинен оору деп эсептелбейт, андыктан ага чалдыккандар дүрбөлөңгө түшпөй эле кадимки жашоосун уланта берсе болот. Болгону рационунан курамында углевод, глюкозасы бар жана майлуу тамактарды алып салышы керек. Анын пайда болгон себептеринин бири — организмдин стресс болуусу. Ошол эле санааркоо, башка дарт менен ооруп калган учурда кан басымы көтөрүлсө инсулин гормону азайып кетип, кант диабети пайда болот. Ошондой эле ата-энеси экөө тең бул илдеттен жабыркаса, балдары да кант диабети менен төрөлөт. Эгер бирөөсү аталган илдет менен ооруса, балада диабетке чалдыгуу кооптуулугу төмөн", — деди Турсункулова.
Эндокринолог илдетти жаңы аныктаган учурда дарыгердин кеңештерин так аткаруу менен оорунун күчөп кетишин алдын алса болорун кошумчалады.
