БИШКЕК, 5-окт. — Sputnik. Мэрия Бишкектеги "Ак кула" жаңы ат майданынын долбоорун иштеп чыгууга кайрадан тендер жарыялады. Бул тууралуу муниципалитеттин маалымат кызматы билдирди.
Эске сала кетсек, 7-сентябрда мэриянын Капиталдык курулуш башкармалыгы мамлекеттик сатып алуулар сайтында жаңы ипподром боюнча тендер жарыяланган.
29-сентябрда арыздар каралып, бирок катышуучулар жок болгонуна байланыштуу мыйзам боюнча тендер өткөрүлгөн жок деп табылган.
Капиталдык курулуш башкармалыгы квалификациялык талаптарды карап чыгуу менен кайрадан сынак жарыялады. Тендердик табыштамалар 23-октябрда ачылат. Конкурска архитектор, дизайнер, конструктор, долбоорлочулар жана башкалар катышса болот.
Азыркы ипподром 1947-жылы салынган. Ал спорттук ат оюндары өткөн бирден бир ири аянтча болгон. Долбоордун автору беларустук архитектор Владимир Нусов.
Сентябрдын башында ипподромдун имаратынын начар акыбалынан улам республикалык маанидеги тарыхый архитектуралык эстелик макамы алынып, аны түрттүрүү боюнча чечим кабыл алынган болчу.
