БИШКЕК, 29-сен. — Sputnik. Бишкектин четиндеги Төмөнкү Ала-Арча айылында бычакталган кыздын иши Чүй ОИИБдин жетекчилигинин көзөмөлүнө алынды. Бул тууралуу облустук милициянын маалымат кызматы кабарлады.
Билдирмеде айтылгандай, учурда кылмыштын бетин ачып, шектүүлөрдү камакка алуу үчүн Ички иштер министрлигинин, Чүй облустук жана Аламүдүн райондук милициясынын тажрыйбалуу кызматкерлеринен турган ыкчам-тергөө тобу түзүлдү.
Кызы менен чогуу бычакталган киши реанимациядан палатага которулду
"Милиция кызматкерлери бир катар иштерди жүргүзүп жатат, бирок тергөө кызыкчылыгына байланыштуу маалымат берилбейт. Ошол эле учурда Төмөнкү Ала-Арчадагы кыздын өлүмү боюнча соттук иштин материалы Чүй ОИИБдин жетекчилигинин көзөмөлүндө турганын билдиребиз", — деп айтылат маалыматта.
Эске салсак, 26-сентябрда 02:50лөр чамасында аталган айылдагы үйгө бет капчан белгисиз эки киши кирген. Алар 62 жаштагы Т.Ж. аттуу киши менен анын 26 жаштагы Т.А. аттуу кызын бычактап, андан соң качып кетишкен. Кыз алган жаракатынан каза болгон. Эркек киши кечээ, 28-сентябрда, оорукананын жандандыруу бөлүмүнөн травматология бөлүмүнө которулган.
Бул факты боюнча Жазык кодексинин негизинде 130-берене ("Киши өлтүрүү") менен кылмыш иши козголгон.
