БИШКЕК, 24-сен. — Sputnik. Башкы прокуратура шайлоо өнөктүгү маалында катталган 128 мыйзам бузуу фактысын иликтеп жатат. Бул тууралуу баш прокурордун орун басары Нурлан Дүйшөмбиев парламенттик шайлоону уюштуруу жана даярдыктар тууралуу маалымат жыйында билдирди.
Анын айтымында, учурда Жазык кодекси боюнча 82 кылмыш иши, Кылмыш жана жоруктар кодекси менен 46 факты катталып, сотко чейинки өндүрүш ачылган.
Sputnik Кыргызстандын кабарчысы "мамлекеттик кызматкерлер административдик ресурсту колдонгону аныкталып, аларга чара көрүлүп жатабы?" деп сурады.
"Учурда бизде административдик ресурс боюнча 11 факты катталып, тергөө жүрүп жатат. Азырынча эч бир кызматкерге чара көрүлө элек", — деди Дүйшөмбиев.
Шайлоо: Башкы прокуратура ЖМКлардагы макалалар боюнча 26 кылмыш ишин козгоду
Жазык кодекси боюнча 82 кылмыш иши төмөнкү беренелер боюнча козголду:
- Шайлоо укуктарын жүзөгө ашырууга тоскоолдук кылуу — 2;
- Шайлоочуларды сатып алуу — 40;
- Шайлоо өнөктүгүн каржылоо тартибин бузуу — 1;
- Шайлоо документтерин бурмалоо — 25;
- Башка беренелер боюнча — 14.
Жоруктар кодекси боюнча 46 иш төмөнкү беренелер боюнча козголду:
- Административдик ресурсту кыянаттык менен пайдалануу — 11;
- Бирөөнүн мүлкүн жок кылуу жана зыянга учуратуу — 22;
- Орчундуу эмес өлчөмдө уурдоо — 8 факты;
- Майда бейбаштык — 5 факты.
Баш прокурордун орун басары жогорудагы фактылар ЖМКга чыккан материалдарга мониторинг жүргүзүүнүн, жарандардын укук коргоо органдарына кайрылуусунун негизинде өндүрүшкө алынганын кошумчалады.
