БИШКЕК, 24-сен. — Sputnik. Оштун Араванында партиялар үгүт иштерин жүргүзүп жатканда массалык мушташ чыгарган деп шектелген 13 адам аныкталды. Бул тууралуу Ош облустук ички иштер башкармалыгынын маалымат катчысы Жеңиш Аширбаев билдирди.
Анын айтымында, 13 кишинин тогузу Араван аймактык ооруканасында жана Оштогу ооруканада дарыланып жаткандыктан, милиция ошол жакты курчоого алып, көзөмөлдөп жатат. Ал эми төрт шектүү эки айга камакка алынды.
"Учурда окуяга тиешеси бар делген дагы эки шектүү изделүүдө. Массалык мушташ боюнча тергөө иштери уланып жатат, ага тиешеси бар адамдар жана күбөлөр сурак берүүдө", — деди Аширбаев.
Жээнбеков Араванда үгүт учурунда чыккан мушташ боюнча оюн айтты
Эскерте кетсек, Ош облусунун Араван районунун Юсупов айыл аймагында 20-сентябрда үгүт ишине 100дөй адам чогулган. Ошол учурда эки партиянын өкүлдөрү мушташа кетишкен. Милициянын билдиришинче, мындан 12 адам жаракат алып ооруканага түшкөн. Учурда 30дан ашык адам сурак берип жатат.
Бул окуяга байланыштуу Араван райондук милициясынын начальниги иштен алынган. Ал эми аймактык милиция күчөтүлгөн тартипте иштеп баштаган.
