БИШКЕК, 7-сен. — Sputnik. Президент Сооронбай Жээнбеков менен кеңешме өткөргөн өкмөт башчы Кубатбек Боронов эрежени сактабай, улам-улам буза берген кафе-ресторандарга айып пул гана эмес, жапканга чейин жоопкерчиликке тартуу туурасында айтты.
Мамлекет башчынын маалымат кызматы онлайн-кеңешмеде Кыргызстандын учурдагы эпидемиологиялык абалы, күз-кыш мезгилине даярдыктар, парламенттик шайлоону өткөрүү маселелери талкууланганын билдирди.
"Өкмөт башчы коомдук транспортто жана көпчүлүк учурда эрежелерди аткарбай жаткан кафе-ресторандарда санитардык талаптардын сакталышын текшерүү боюнча рейддер жүргүзүлүп жатканын билдирди. Эрежени сактабай улам-улам буза берген кафе-ресторандарга айып пул гана эмес, жапканга чейин жоопкерчиликке тартуу сунушталды", — деп айтылат маалыматта.
Кеңешмеде мамлекет башчы негизги басымды коронавирустун кийинки этаптагы таралуусунун алдын алууга басым жасаган.
Коронавирустун экинчи толкунуна туруштук бере алабызбы? Саресеп
"Жээнбеков коронавирус инфекциясынын экинчи толкуну болбошуна эч кандай кепилдик жок экенин өзгөчө белгиледи. Ага байланыштуу аймактардагы ооруканалардын курулушу менен реконструкциялоо иштерине, жаңы медициналык мекемелерди жабдууга, кошумча орундарды даярдоого жана дары-дармектердин запасын камсыз кылууга көңүл бурду", — деп билдирген маалымат кызматы.
Андан сырткары, парламенттик шайлоонун алдында шайлоо тилкелерин талаптагыдай техникалык жана санитардык даярдыктар менен камсыз кылуу, шайлоо мыйзамдарынын сакталышына көзөмөлдү күчөтүү зарылдыгын баса белгилеген.
