БИШКЕК, 31-авг. — Sputnik. Бул жылдын аягына чейин социалдык-маданий багыттагы 112 объектинин курулушу аяктайт. Анын 70и билим берүү, ал эми 17си саламаттык сактоо уюмдарынын мекемеси экендигин өкмөттүн маалымат кызматы кабарлады.
Билдирмеге ылайык, премьер-министр Кубатбек Боронов социалдык объектилердин, жолдордун, ичүүчү таза суунун жана ирригация объектилеринин курулуш маселелери боюнча кеңешме курган.
Өкмөт башчы социалдык объектилерди белгиленген мөөнөттө колдонууга берүү керектигин айткан.
"Курулуш иштерин план боюнча аяктоо шарт. Ошол эле учурда алардын сапаттуу бүткөрүлүшүн катуу көзөмөлгө алгыла. Муну менен катар план боюнча 1-сентябрда 11 мектеп колдонууга берилүүгө тийиш. Социалдык объектилерди оңдоо жана курулушун камсыздоо өкмөттүн бирден-бир милдети экенин эсиңерден чыгарбагыла", — деген Боронов.
Суу ресурстары мамлекеттик агенттигинин маалыматына ылайык, быйыл 79 айылга ичүүчү таза суу киргизилет. Учурда бул багыттагы иштер активдүү жүрүүдө.
Кыргызстанда курулуп жаткан 14 ооруканага 206,5 млн. сом сарпталат
Мындан тышкары, төрт ирригациялык объектинин курулушу аяктайт. Алар — Ысык-Көл облусунун Тоң районундагы Ак-Өлөң каналы, Талас облусунун Кара-Буура районундагы Сарымсак каналы, Баткен облусундагы Р-4 вх каналы жана Кадамжай районундагы Молдо Нияз суу чарба пайдалануучулар ассоциациясынын каналы. Булардын бүтүшү менен 2300 гектар жаңы сугат жер өздөштүрүлмөкчү.
Транспорт жана жолдор министри Жанат Бейшеновдун айтымында, 2020-жылдын аягына чейин стратегиялык маанидеги жолдордун 92 чакырымы курулуп бүтөт. Ал эми район борборлорундагы жолдордун 165 чакырымына асфальт төшөлөт.
Өз кезегинде Боронов объектилерди курууда жана оңдоодо курулуш ченемдери менен эрежелерин аткаруу боюнча талаптарды көзөмөлдөө аркылуу иштин сапатына өзгөчө басым жасоо зарылдыгын белгилеген.
