БИШКЕК, 19-авг. — Sputnik. Акыркы аптада Кыргызстанда коронавирус жуктуруп алуу көрсөткүчү 4,9 пайызды түздү. Бул абал турукташып калды деген көрсөткүчтөн дагы төмөн экенин брифинг учурунда премьер-министр Кубатбек Боронов билдирди.
"Дүйнөлүк саламаттык сактоо уюмунун (ДССУ) критерийлери боюнча вирус жугузуп алуунун көрсөткүчү өткөн аптада 6,6 пайыз болуп, белгиленген чектен бир аз жогору болуп жаткан. Бул аптада 4,9 пайызга түштүк. Ошондой эле Россиядагы Керектөөчүлөрдүн укугун коргоо жана адамдык бакубатчылык боюнча федералдык кызматынын (Роспотребнадзор) эсептөө методикасы боюнча дагы биздеги абал жакшырды", — деди Боронов.
Кечээ 312 киши коронавирустан сакайса, кайра 179 жаңы учур катталды
Бирок ал эл жана мамлекеттик органдар ушуну менен өзүн таштап койбой, аягына чейин күрөшүүсү керектигин эскертти.
"Ооба, оору азайды, өлүм жокко эсе болуп калды. Бирок айрым аймактарда эпидемиологиялык кырдаал оор бойдон", — деди өкмөт башчы.
Республика боюнча коронавирустан айыккандардын саны 35 197 киши болду. Жуктургандар жалпысынан 42 325ке, каза тапкандар 1 054кө жетти.
