БИШКЕК, 11-авг. — Sputnik. 2020-жылдын январь-июль айларынын аралыгында Кыргызстан 18 миллиард 84,4 миллион сомду мамлекеттик карызды тейлөөгө жумшаган. Бул тууралуу Финансы министрлигинин сайтында айтылат.
Адегенде аталган чыгымга 28 миллиард сом коротуу пландалган, бирок доллардын курсунун өсүшү жана башка себептерден улам төлөм дагы 4 миллиардга көбөйгөн.
Өкмөт: Кытай баштаган бир катар өлкө Кыргызстандын карызын сурабай турат
Жети айдын жыйынтыгы менен төмөнкүдөй каражат төлөнгөн:
- тышкы карыз — 8 миллиард 371,6 миллион сом;
- ички карыз — 9 миллиард 712,8 миллион сом.
Июнь айынын аягында мамлекеттик карыз 4,8 миллиард долларды түздү. 6-августка карата эл аралык уюмдардан Кыргызстанга 333,3 миллион доллар келген. Насыянын көпчүлүк бөлүгү бюджетти, жеке секторду жана саламаттык сактоо чөйрөсүн колдоого жумшалган.
Июль айында кыргыз өкмөтү дээрлик бардык кредиторлор менен 2020-жылдагы тышкы карызды тейлөө боюнча төлөмдөрдү дагы 3-4 жылга жылдыруу жөнүндө макулдашууга жетишкенин жарыялаган.
