БИШКЕК, 30-июл. — Sputnik. Өлкөдөгү коронавирус пандемиясын эске алып быйыл курч мүнөздөгү респиратордук вирустук инфекцияларга каршы 700 миңден ашык вакцина сатып алуу пландалууда. Бул тууралуу Мамлекеттик санитардык-эпидемиологиялык көзөмөл департаментинин ооруларды алдын алуу жана эпидкөзөмөл бөлүмүнүн башчысы Динагүл Оторбаева брифинг учурунда билдирди.
Анын айтымында, күз-кыш мезгилинде жылда эле сасык тумоого кабылгандардын саны өсөт.
"Октябрдан баштап апрелге чейин сасык тумоо сезону бүтпөйт. Айрыкча декабрь, январь айларында күчөйт. Былтыркы сезондо сасык тумоонун В түрү басымдуулук кылып, А түрү да көп катталды. Ооруну алдын алып, азайтуу максатында бийлик жыл сайын ага каршы вакцина сатып алчу. Быйыл да 111 миңден ашык вакцина алууга тендер өткөрүлгөн. Бирок коронавирус пандемиясын эске алып 700 миң доза сатып алууга арыз берилди", — деди Оторбаева.
Кыргызстан COVID-19дун кийинки толкунуна кантип кам көрүүдө? Бороновдун жообу
Адис бул вакциналар биринчи кезекте медиктерге, тез-тез ооруган балдарга, жашы 65тен өйдөлөп калгандарга, өнөкөт оорусу барларга акысыз сайыла тургандыгын белгиледи.
"Бат ооруй бергендерди, өнөкөт дарты барларды, улгайгандар жана медиктерди эсептегенде болжол менен 700 миңдей болду. Ошол себептен ага жараша вакцина алдыруу пландалууда. Негизи Дүйнөлүк саламаттык сактоо уюму жыл сайын сасык тумоонун кайсы түрү жүрөрүн божомолдойт. Ага жараша вакцина аныкталат. Сасык тумоого каршы вакцинанын эки түрү бар. 4 валенттүү жана 3 валенттүү. Быйыл биз 3 валентүү вакцинаны сатып алабыз", — деди адис.
Ал айрым медициналык мекемелерге да сасык тумоого каршы эмдөө жүргүзүү боюнча уруксат берилгенин, бирок ал бекер эместигин айтты.
"Кроха", "Малыш","312" жана "Цадмир" клиникалары каалоочулар үчүн сасык тумоого каршы эмдешет. Бирок бул жактарда акы төлөш керек", — деди Оторбаева.
Буга чейин өкмөт башчы Кубатбек Боронов гриппке каршы эмдөө кимдерге акысыз жасаларын айткан.
