БИШКЕК, 25-июл. — Sputnik. Жаза аткаруу мамлекеттик кызматы Азимжан Аскаровдун каза болгону тууралуу расмий билдирүү таратты.
Маалыматка ылайык, ал №47 абак жайынын ооруканасына оң тараптуу пневмония диагнозу менен түшүп, кычкылтек концентраторуна туташтырылган.
"Сатурациянын деңгээли 80-83 болчу. Ал туташтырылган концентраторду атайын алып салып, каршылык көрсөткөн. Аскаров дарыгердин көзөмөлүндө болду. 25-июлда саат 09:30да кайрадан кычкылтек концентраторун үзүп салып, 10:30да көз жумган", — деп айтылат билдирүүдө.
Аскаровдун сөөгү Республикалык соттук-медициналык экспертиза бөлүмүнө жиберилген. Ал жерден атайын экспертиза жүргүзүлүп, укук коргоочунун өлүмүнүн себеби аныкталат.
2010-жылдагы июнь окуясы боюнча өмүр бою эркинен ажыратылган Азимжан Аскаров Чүй облусунун Сокулук районуна караштуу Жаңы-Жер айылындагы №19 мекемесинде жазасын өтөп жаткан. Ал 69 жашта болчу.
