БИШКЕК, 21-июл. — Sputnik. Өкмөт тарабынан буга чейин жактырылган "Ишкерлик субъектилерин каржылоо" программасын ишке ашыруу үчүн коммерциялык банктарга 4,2 миллиард сом бөлүндү. Бул тууралуу өкмөттүн маалымат кызматы кабарлады.
Ага ылайык, жалпы сумманын 2,2 миллиард сому Финансы министрлиги тарабынан, ал эми 2 миллиард сому Улуттук банк тарабынан бөлүнгөн.
Карабаева: мөөнөтү жылдырылган насыялар жалпы 74,5 млрд. сомду түздү
"Программа экономикалык жана социалдык туруктуулукту калыбына келтирүүгө жана камсыздоого, ошондой эле эпидемия шартында ишкерлик субъектилерин колдоого багытталган. Анын алкагында акча негизги каражаттарды жана жүгүртүү каражаттарын кредиттөөгө, ошондой эле насыяларды кайра каржылоого багытталат. Ошондой эле чакан жана орто ишкерлик субъектилерине жеңилдетилген кредиттер берилет", — деп айтылат маалыматта.
Карабаева: насыя боюнча жеңилдик алгандардын 28%ы соодагер
Кечээ, 20-июлда, Финансы министрлиги "Ишкерлик субъектилерин каржылоо" программасынын алкагында сегиз коммерциялык банкка жалпы суммасы 1,4 миллиард сом болгон кезектеги траншты бөлдү.
- "Айыл Банк" — 350 миллион сом;
- "РСК Банк" — 350 миллион сом;
- "Бакай Банк" — 210 миллион сом;
- "Оптима Банк" — 200 миллион сом;
- "Кыргызстан Коммерциялык Банкы" — 120 миллион сом;
- "Кыргыз Инвестициялык-Кредиттик Банк" — 120 миллион сом;
- "Банк Бай Түшүм" — 30 миллион сом;
- "Финанскредитбанк" — 25 миллион сом.
Буга чейин Финансы министрлиги коммерциялык банктар үчүн жалпы суммасы 840 миллион сомго эки аукцион өткөрүп, жыйынтыгы боюнча алты банк ишкерлик субъектилерин жеңилдетилген кредиттөө үчүн каражат алган.
