Жумаканова: президентти коштоп Москвага баргандар үч ирет анализ тапшырган
Москвага барган делегация өкүлдөрүнөн анализ алууда Россия тарап койгон талаптар толугу менен аткарылган. Вирус чыккан эмес. Ал эми Москвадан коронавирус аныкталып калганына бир канча объективдүү жана субъективдүү себептер болушу мүмкүн. Бул тууралуу Айгүл Жумаканова Sputnik Кыргызстан радиосуна маек куруп жатып билдирди.
Анын айтымында, изилдөөлөр Россиянын "Вектор" институтунан өндүрүлүп чыккан ПЦР-тесттер менен жүргүзүлгөн.
"Жеңиштин 75 жылдыгына арналган иш-чарага катышууга барган делегацияга изилдөөлөр улуттук лабораторияда жүргүзүлгөн. Анализдер Россия тарап сунуштаган талаптарга ылайык жасалды. Ошондой эле талап боюнча делегация мүчөлөрү бир сутка аралык менен үч ирет анализ тапшыруусу керек болчу. Мындан тышкары, акыркы анализдер бир сутка мурун алынышы керек эле. Бул талаптардын баары аткарылып, тийиштүү алгоритмдер жасалган. Тактап айтканда, 18, 20, 22-июнда изилдөөлөр жүргүзүлдү. Баары таза чыккан. Тилекке каршы, Москвага барганда делегациянын эки өкүлүнөн коронавирус чыгып калыптыр. Мунун объективдүү жана субъективдүү көптөгөн себептери бар. Вирусту изилдөө — бул чоң илим. Адамдын организмине киргенден кийин ал дароо эле көбөйбөйт. Ал организмде алгач өзүнө ыңгайлуу чөйрө даярдайт. Андан кийин көбөйүп баштайт. Балким COVID-19 аныкталып калган делегация мүчөлөрүнөн биз анализ алганда, вирустун саны аз болгон болушу ыктымал. Андан тышкары, анализ кандай алынганынан тартып, транспортировка болгонунан дагы көз каранды болот. Албетте, тест-системанын сапаты дагы таасир берет. Бирок биз иштеп жаткан тест-системалардын сапаттары жакшы. Ошондой эле адамдык фактор деген бар. Анализ тапшыргандан кийин алар башка жактарга барган болушу мүмкүн. Вирустун инкубациялык мөөнөтү 12-14 күн болгондуктан, анализ тапшырган адам ушул убакытта обочолонууда болушу шарт", — деди Жумаканова.
Ошондой эле ал учурда өлкөдө Россиядан, Белоруссиядан, Түркия, Корея жана Кытайдан келген тест-системалары колдонулуп жатканын кошумчалады.
