Быйыл ал 24-июнда өттү. 1945-жылы дал ушул күнү тарыхый, легендарлуу Жеңиш парады болгон. Чакырылган ардактуу коноктордун арасында мурдагы союздук республикалардын дээрлик бардыгынын жана бир катар алыскы чет мамлекеттердин лидерлери болду. Кызыл аянттагы параддан россиялык жоокерлер менен катар эле Кыргызстандын, Азербайжандын, Армениянын, Белоруссиянын, Казакстандын, Молдованын, Тажикстандын жана Өзбекстандын аскерлери өттү.
Параддын алдында сүйлөгөн Россия лидери Владимир Путин совет элинин нацизмди жеңгендигин дагы бир ирет баса белгиледи. Параддын салтанаттуу бөлүгү россиялык авиация күчтөрүнүн майрамдык учуулары менен аяктады. Андан соң Владимир Путин жана чет элдик коноктор Кремль дубалындагы Белгисиз жоокердин мүрзөсүнө гүлчамбар койду.
