Нуракун уулу: "ооруп калганыңызга канча төлөп беришти" дегендер бар

Башында кадимки сасык тумоо деп ойлогом. Бирок баары бир чочулап, үйдөн чыкпай жаткам. Бул тууралуу Ибраим Нуракун уулу Sputnik Кыргызстан радиосуна билдирди.

Анын айтымында, дене табы көтөрүлгөндөн баштап үчүнчү күнү такыр жыт сезбей калган.

"Алгач кадимки эле сасык тумоодой башталат экен. Дене табым 37ден бир аз көтөрүлгөнү болбосо эч нерсени деле сезбей жүрдүм. Бирок үйдөн иштеп, балдарымды өзүмдөн алыстатып жаттым. Анализ тапшырдым. Тумоолоп калдым окшойт деген үчүнчү күнү мурдумдун жыт сезүүсү такыр жоголуп, эч нерсенин жытын билбей калдым. Ушул күнү анализимдин жыйынтыгы чыгып вирус аныкталды. Алгач үйдөн эле дарыланам деп ойлогом, бирок кечинде заматта өпкөм толуп бараткандай аба жетпей, демим кысылып Тез жардам кызматын чакырдым. Коронавирус ушунусу менен опурталдуу экен. Абалың көз ирмемде өзгөрүп кетиши толук мүмкүн тура. Ооруканада дарыгерлердин улам кабар алып турганы да ушундан деп ойлойм. Тилекке каршы, коомчулукта али күнгө чейин бул вируска ишенбегендер бар. Кесибим журналист болгон соң колумдан келишинче өз мисалымда аларга вирустун бардыгын жеткирүүгө аракет жасап жатам. Күлүп, жыргап эле жүрөсүз, эмнеге ооруканага жатып алдыңыз же канча төлөп беришти ушуну жасаганыңызга дегендер да жок эмес. Ошентсе да калкты бул вирустан сак болууга чакырам", — деди Нуракун уулу.

Ал санитардык эрежелерди сактоо менен эгер оорунун белгилери байкалса, дароо медициналык кызматкерлерге кайрылуу керектигин кошумчалады.