БИШКЕК, 24-июн. — Sputnik. Кыргызстан коронавирус пандемиясынан улам чет өлкөлүк донорлордон 627 миллион 330,4 миң доллар (болжол менен 47 миллиард сом) каражат алуу аракетин көрүүдө. Бул туурасында Финансы министрлигинин отчётунда жазылат.
Маалыматка караганда, аталган сумманын 461 миллион 522,9 миң доллары кредит, 165 миллион 807,5 миң доллары грант түрүндө берилмекчи.
Бүгүнкү күндө Кыргызстанга 300 миллион 112,9 миң доллары келип түштү, калган 327 миллион 217, 4 миңи макулдашуу процессинде турат.
Каражаттар бюджетти колдоо, COVID-19 инфекциясынын жайылышына жол бербөө жана экономиканы колдоо деп үч багыт менен алынууда.
Алынган жана макулдашууда турган каражаттар:
- Эл аралык валюта фондунан 241,9 миллион доллар кредит алынды;
- Азия өнүктүрүү банкы 135 миллион доллар берет. Учурда 50 миллион доллар (жарымы грант) келип түштү. Калган 85 миллион доллары (69 млн кредит, 16 млн грант) макулдашуу процессинде турат;
- Дүйнөлүк банктан 121,15 миллион доллар алуу боюнча келишим түзүлдү. Аталган сумманын 50 пайызы кредит, калганы грант түрүндө берилмекчи. Бүгүнкү күндө 8,16 миллион доллары Финансы министрлигинин эсебине түштү. Ал эми 112,99 миллион доллары макулдашууда;
- Азия инфраструктуралык инвестициялар банкынан 50 миллион доллар кредит алуу боюнча сүйлөшүү жүрүүдө;
- Ислам өнүктүрүү банкынан 15 миллион доллар кредит алуу макулдашылып жатат;
- Европа биримдиги 33, 88 миллион доллар грант берери күтүлүүдө;
- KfW Германия өнүктүрүү банкынан 30,3 миллион доллар грант алынат.
Белгилей кетсек, Финансы министрлигинин маалыматы боюнча, коронавирус пандемиясынан улам бюджетке быйыл 27,6 миллиард сом түшпөй калары болжолдонууда.
