БИШКЕК, 22-июн. — Sputnik. Президент Сооронбай Жээнбеков “2019-жылдын 28-мартында Бишкек шаарында кол коюлган 2012-жылдын 20-сентябрындагы Кыргызстандын аймагындагы бириккен россиялык аскердик базанын туруусунун статусу жана шарттары жөнүндө КР менен РФ ортосундагы макулдашууга өзгөртүүлөрдү жана толуктоолорду киргизүү протоколун ратификациялоо жөнүндө” мыйзамга кол койду.
Мыйзам 2020-жылдын 11-июнунда Жогорку Кеңеш тарабынан кабыл алынган.
Протокол 2016 жана 2017-жылдары Россия менен биргеликте кыргыз өкмөтү тарабынан жүргүзүлгөн Россия тарап ижарага алган жер участокторун топографиялык сүрөткө тартуунун жыйынтыгы боюнча даярдалган.
“2012-жылдагы макулдашууга ылайык, Россия тарап ижарага алган жер участокторунун аянты 866,2 гектарды түзөт. Инвентаризациянын жыйынтыгы боюнча россиялык тарап иш жүзүндө колдонгон аянт 924,52 гектарды түздү, мында Макулдашууда көрсөтүлгөндөн 58,32 гектарга көп жер аянты пайдаланылган”, — деп айтылат билдирүүдө.
Протокол күчүнө киргенден кийин тараптар Россия Федерациясы иш жүзүндө пайдаланган жер участокторунун аянттары үчүн ижара акысын Кыргызстанга 2012-жылдын 20-сентябрынан баштап төлөө боюнча ишти уюштурушат.
Тараптардын мамлекеттердин коопсуздугун камсыз кылуу үчүн Кыргызстандын аймагындагы базага учкучсуз учуучу аппараттарды жайгаштыруу пландалууда.
Мында протоколго кол коюлгандан жана күчүнө киргенден кийин тараптар учкучсуз учуучу аппараттарды колдонуунун тартибин аныктоочу ведомстволор аралык документке кол коюшат.
