ОШ, 19-июн. – Sputnik. Кадамжай районунда 27 жаштагы жигитти уурдап, барымтага алды делген шек менен беш жаран кармалды. Бул тууралуу Баткен облустук ички иштер башкармалыгынын маалымат катчысы Дамира Юсупова Sputnik Кыргызстан агенттигине билдирди.
Анын айтымында, окуя 2-март күнү болжол менен саат 21:00 чамасында болгон.
Кадамжай районунун тургуну милицияга кайрылып, анын 27 жаштагы уулун белгисиз кишилер сыртка чакырып кетип, ошондон кийин ал келбегенин айтып, арыз жазган.
Аталган окуя боюнча ыкчам кызматкерлердин иликтөө иштеринин жүрүшүндө 18-июнда Ош шаарынын 32, 21, Өзгөн районунун 22 жана буга чейин каракчылык фактысы менен соттолгон, кийин Россия аймагында жашырынып жүргөн Кара-Суу районунун 22 жаштагы тургундары кармалды. Шектүүлөр учурда убактылуу кармоочу жайга киргизилди. Тергөө иштери жүрүп жатат.
Ал эми укук коргоо органдарындагы ишенимдүү адамдардын билдиргенине караганда, белгисиз адамдар жабырлануучуну уурдап, барымтада кармап жаткан жеринен анын ден соолугу начарлап, өзүн жоготкон. Ошол маалда алар туткунду шаардагы көчөлөрдүн бирине таштап кетишкен. Жыйынтыгында, ал ооруканага түшүп, өзүнө келген соң ким экени аныкталып, кылмыш иши ачылган.
Алар жабырлануучуну акча маселесинен улам жашаган үйүнөн чакырып чыгып, уурдап кетип, Ош шаарындагы батирлердин биринде үч күн бою кармап турушкан.
