Депутаттар Бороновдун өкмөтүн бекитип жатат. Тексттик трансляция

Жогорку Кеңештин 105 депутаты Бороновго жана анын өкмөтүнө "макул" деген добуш берип, экөө каршы чыкты.

Андан соң Боронов эл өкүлдөрүнө ыраазычылык билдирип, өлкөнү өнүктүрүүгө, экономиканы алдыга жылдырууга жана элдин жыргалчылыгы үчүн бар күчүн жумшап иштөөгө убада берди. 

Парламенттен колдоо тапкан өкмөттү кызматка дайындоо боюнча президент Сооронбай Жээнбековдун Жарлыгы чыккандан кийин расмий түрдө кызматка кирешет.

Бүгүн парламенттин жалпы жыйынында өкмөттүн жаңы курамы каралып жатканда депутаттар Камчыбек Жолдошбаев менен Рыскелди Момбеков айтыша кетти.

Алгач Жолдошбаев өкмөттүн курамына берилчү суроо-жоопту саат 13.00гө чейин бүтүрүүнү сунуштаган.

"Коронавирус бүгүн 10 адамга аз чыгыптыр, Кубатбек Айылчиевич эртерээк барып ушулар менен алектенип иштесин да. Мүмкүн болсо түшкө чейин карап бүтүрсөк. Депутаттар мага келип "ушуну айтып коюңузчу" деп суранды. Карала турган мыйзам долбоорлору толтура", — деди Жолдошбаев.
Андан соң Момбеков чыгып ачууланып, кайсы депутат андан суранып жатканын айтууну талап кылды.

Депутат Төрөбай Зулпукаров премьер-министрликке талапкер Кубатбек Боронов менен биринчи вице-премьерликке көрсөтүлгөн Алмазбек Баатырбековдон парламенттик шайлоо тууралуу сурады.

Депутат “шайлоодо бир дагы партияга тарпай иштей аласыздарбы?” деген суроо узатты.

“Кечээ коалиция бизге ишеним көрсөткөндөн кийин президенттин кабыл алуусунда болдук. Сооронбай Шариповичтин дагы биринчи талабы ушундай. “Акыйкат, элдин баары ынангандай таза шайлоону өткөрүү өкмөттүн негизги тапшырмасы” деп белгиледи. Биздин ага эркибиз жетет, буга чейин да ушундай штабдарда иштеп келгенбиз. Аны жасоого мүмкүнчүлүгүбүз бар”,  — деди Боронов.

Ал эми Баатырбеков буга чейинки эки шайлоодо нааразычылыктар болгонун белгилеп, мында андай мүчүлүштүктөрдү кетирбөөгө убада берди. Ошондой эле таза шайлоону өткөрүүгө бар күчүн жумшай турганын кошумчалады. 

Депутат Дастан Бекешев Кубатбек Бороновго премьер-министр болуп калса, тойлорго көп барбай иштөөнү сунуштады.

Учурда парламент жалпы жыйында Боронов башында турган өкмөттүн жаңы курамын карап жатат.

"Сиз азыр премьер-министр болгону турасыз. Жоопкерчиликти сезип жатасыз да, туурабы? Мурункудай тойлорго катышпай иштесеңиз. "Биздин тойго катышты, самса жеди" деген сөздөрдү укпайлы. Премьер-министрлик өтө маанилүү кызмат", — деди Бекешев.

Премьер-министрликке Кубатбек Боронов көрсөтүлөт;

Биринчи вице-премьерликке экс-депутат, "Кыргызстан" фракциясынын мурдагы лидери Алмазбек Баатырбеков сунушталды;

Өкмөттүн аппарат жетекчиси Самат Кылжыевдин ордуна Өзгөчө кырдаалдар министрлигинин мурдагы статс-катчысы Таалайбек Темиралиевдин талапкерлиги каралууда;

Маалыматтык технологиялык жана байланыш комитетинин жетекчиси Дастан Догоевдин ордуна Жогорку технологиялар паркынын директору Алтынбек Исмаилов көрсөтүлдү.

Өкмөттүн калган мүчөлөрү өзгөрүүсүз калды.

Боронов учурда кыргыз өкмөтүнүн программасын жана жаңы курам боюнча маалымат  берип жатат.

Отставкага кеткен Абылгазиевдин ишине ийгилик каалады.