БИШКЕК, 11-июн. — Sputnik. Кыргыз өкмөтүнүн экинчи антикризистик планына ылайык, ишкерлерге жеңилдетилген насыя берүү программасы иштелип чыгып бекитилди. Анын шарттары боюнча вице-премьер Эркин Асрандиев брифинг учурунда түшүндүрүп берди.
Насыялар ким аркылуу берилет?
Коммерциялык банктар жана микрокредиттик ишканалар аркылуу. Учурда алар менен сүйлөшүүлөр жүрүп жатат, жакында тизмеси жарыяланат. Финансылык мекемелер кредитти өкмөт бекиткен шарттын негизинде гана бериши керек.
Качан бериле баштайт?
Ишкерлер банктарга 22-25-июндан тарта кайрылса болот. Ага чейин Финансы министрлиги менен банктар ортосунда келишимдер түзүлүп, каржы бөлүштүрүлүшү керек.
Буга чейинки маалыматта беш-алты тармактын каржыланары кабарланган.
Күрөөсүз микронасыялоо
Бул өзүнчө компонент, өтө чакан ишкерликке багытталган. Микронасыялар 14 пайыздык чен менен берилет. Бул коммерциялык насыяларга салыштырмалуу 2,5 эсе арзан экени айтылат. Мөөнөтү 12 айга чейин.
Ири суммадагы насыялардын шарттары
Сом менен берилет, жылдык ченеми 6-10 пайызга чейин. Кутулуу мөөнөтү — 3-5 жыл, ортодо 1,5 жыл негизги суммага каникул жарыяланат.
Өзгөчө шарт
Айрым ишкерлер мурдагы алган насыяларынан кутула албай жаткан мисалдар көп. Аларга алынган кредиттин тең жарымы менен мурдагы кредитти жапканга жумшоого уруксат берилет.
Аймактар боюнча
Мамлекеттик саясаттын негизги багыттарынын бири — аймактарды өнүктүрүү болгондуктан, жеңилдетилген насыялардын 60 пайызы дал ошол аймактарда өздөштүрүлүшү зарыл.
