БИШКЕК, 11-июн. — Sputnik. Таласта дагы эки кишиден коронавирус аныкталды. Анын бири буга чейин вирус жуктурган медиктин жолдошу болсо, экинчиси кошунасы. Бул тууралуу саламаттык сактоо министринин орун басары Нурболот Үсөнбаев брифинг учурунда билдирди.
Эске салсак, 10-июнь күнү Таласта бир медиктин оору жуктуруп алганы айтылган. Кыргызстанда коронавирус аныкталган алгачкы күндөн тарта (18-марттан) Таласта вирус катталган эмес.
"Таласта бир гана медиктен коронавирус аныкталган. Андан соң аны менен байланышта болгон адамдардын баары текшерилип, бүгүн медиктин жолдошу менен кошунасынан COVID табылды. Эми алар менен байланышта болгон адамдардын баарынан анализ алынып жатат. Медицина кызматкери да бир топ адам менен байланышта болгон. Бир эле адам жүздөгөн киши менен байланышып, анын баарын текшерүүгө туура келип жатат", — деди Үсөнбаев.
Буга чейин өкмөттүн Талас облусундагы өкүлү Марат Мураталиев дартка кабылган медиктин күйөөсүндө оорунун симптомдору биринчи пайда болгонун, бирок андан вирус аныктала электигин айткан. Облус жетекчиси 300дөй киши карантинге алынып, медик аял иштеген оорукана дезинфекция иштерин жүргүзүү үчүн жабылганын билдирген.
Кыргызстанда коронавирус жуктургандардын саны 2129 болсо, анын ичинен 1630у айыгып чыкты. Тилекке каршы, бул оорудан 26 адам көз жумду.
