БИШКЕК, 9-июн. — Sputnik. Президент Сооронбай Жээнбеков "КРдин 2020-жылга республикалык бюджети жана 2021-2022-жылдарга болжолу жөнүндө" мыйзамына өзгөртүүлөрдү киргизди. Жогорку Кеңеш тарабынан 21-майда кабыл алынган документке бүгүн кол коюлганын мамлекет башчынын маалымат кызматынан билдиришти.
"Аталган мыйзам менен 2020-жылдын республикалык бюджети кирешелер боюнча 135 346,8 миллион сом суммасында жана чыгашалар боюнча 163 039 миллион сом суммасында бекитилди. Ошондой эле бюджеттин тартыштыгы 27 692,2 миллион сомду түзүүдө", — деп айтылат билдирүүдө.
Эске салсак, 2020-жылга республикалык бюджеттин параметрлери коронавируска каршы багытталган карантиндик чаралардын натыйжасында социалдык-экономикалык өнүгүүнүн көрсөткүчтөрүнүн өзгөрүүлөрүн эске алуу менен кайра каралган.
Кыргыз өкмөтү быйылкы бюджет тартыштыгын жоюу боюнча ички киреше булактарын издеп, бул максатта бир нече мыйзам долбоорун иштеп чыккан эле.
Мыйзам расмий жарыяланган күндөн тартып күчүнө кирет.
