Өкмөт: Баткендеги чек ара чатагы боюнча сүйлөшүү уланууда, жарадарлар бар

Жазылуу
Чатак чыккан аймактагы абалды турукташтыруу үчүн кошумча тартип коргоо органдарынын кызматкерлери тартылды. Кагылышуудан жарадар болгон адамдар бар экени айтылды.

БИШКЕК, 1-июн. — Sputnik. Кыргызстан менен Өзбекстандын жергиликтүү бийлик органдары кыргыз-өзбек чек арасындагы жашоочулар ортосунда болгон чатак боюнча сүйлөшүүлөрдү жүргүзүп жатат. Бул туурасында өкмөттүн маалымат кызматынан кабарлашты.

“Өкмөттүн Баткен облусу боюнча өкүлүнүн биринчи орун басары Жаркынбек Максутов, Кадамжай районунун акими Алгынбай Имаров Фергана облусунун губернатору Шухрат Ганиев, Сох районунун акими Фарух Усаров менен сүйлөшүүлөрдү жүргүзүп жатат”, - деп айтылат маалыматта.

Эске салсак, бүгүн, 31-май күнү, саат 12:30дар чамасында Кадамжай районунун Чечме айылынын тургундары менен Өзбекстандын Сох районунун Чашма айылынын тургундарынын ортосунда чыр чыккан. Окуя боюнча интернетте бир нече видео тараган.

“Учурда абалды турукташтыруу үчүн кошумча аскерлер - тартип коргоо органдарынын кызматкерлери тартылды. Чатактан жаракат алгандар бар”, - деп айтылат маалыматта.

Баткен аймагындагы кыргыз-өзбек чек арасында жаңжал маал-маалы менен чыгып турат.

Жаңылыктар түрмөгү
0