БИШКЕК, 28-май — Sputnik. Бишкектеги "Автомаш-Радиатор" ишканасынын бир бөлүгүндөгү жети кызматкерден коронавирус табылды. Бул тууралуу мэриянын маалымат кызматы кабарлады.
Билдирмеге ылайык, шаардын башкы санитардык дарыгери Кубан Кундашев радиатор жасалган өндүрүш жайын карантинге жапты. Анда иштеген 38 кызматкердин бардыгы 14 күнгө үй карантинге кетишти. Алардан анализ алынып жатат.
"Атайын техника саткан зал өзүнчө иштейт. Ишкана кызматкерлери дезинфекция кылган туннель коюп, санитайзер орнотушкан. Тобокелчилик тобуна кирген (60 жаштан жогору курактагылар) аралыктан иштеп жатышат", — деп айтылат маалыматта.
Аталган компания автоунаа куруу жаатындагы ири ишканалардын бири. Бул жакта ЕАЭБге кеткен айыл чарба техникалары куралып чыгарылат.
Кыргызстанда коронавирус жуктуруп алгандардын саны 1594кө жетти. Коронавирустан 1066 бейтап айыгып чыгып, тилекке каршы, 16 адам көз жумду.
Өлкөдөгү абал тууралуу Sputnik Кыргызстан тексттик баяндама жүргүзүүдө.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
