БИШКЕК, 26-май — Sputnik. Япония бийлиги COVID-19 пандемиясынан улам Кыргызстан жана дагы он мамлекеттин жарандарын өз аймагына кирүүгө чектөө киргизди. Бул тууралуу Kyodo News басылмасы премьер-министр Синдзо Абэнин дүйшөмбү күнү маалымат жыйынында айткан сөзүнө шилтеме кылып жазды.
Аталган чечим 27-майда күчүнө кирет. Тизмеге Индия, Пакистан, Бангладеш, Аргентина, Сальвадор, Гвинея, Гана, Түштүк Африка Республикасы, Афганистан жана Тажикстан бар. Бул өлкөлөр тыюу салынган мамлекет жана аймактардын катарына кошулгандыгын Япониянын ТИМинин расмий сайтында жарыялаган.
Өткөн жумада Япониянын Тышкы иштер министрлиги аталган мамлекеттерге баруу "кооптуу" деп чечим чыгарган. Документ ал өлкө жана аймакты көздөй жолго чыгуудан толук баш тартууну сунуштайт. Жалпы Япония өкмөтү кооптуулукту төрт даражага бөлгөн. Биринчиси жеңил болсо, төртүнчүсүндө жарандарды эвакуациялоо каралган.
