БИШКЕК, 24-май — Sputnik. Адамдын көңүлүн көтөрүп, жакшы маанайга өбөлгө болгон серотонинди иштеп чыгуучу пайдалуу азыктар тууралуу Москва облусунун врач-психиатры Ольга Сиволдаеванын айтканын РИА Новости жарыялады.
Анын айтымында, маанайды көтөрүүгө банан, жаңгак жана шпинаттын таасири жогору.
"Организмде серотонин төмөндөп кеткенде бизде серотонин-дефомин системасынын балансы сакталбай калат. Серотонин өзү тамак-ашта болбойт. Ал болгону курамына кайсы бир деңгээлдеги триптофанды (аминокислот тегиндеги) камтыйт. Ал эми серотониндин деңгээлин жогорулатуучу "антидепресанттарга" банан, жаңгак жана шпинат кирет. Банан серотониндин иштелип чыгышын шарттаган тоюмдуу азык болсо, жаңгакта Омега-3 майы, шпинатта фолий кычкылы бар", — деди Сиволдаева.
Эксперт белгилегендей, серотонин ошондой эле дене табына, маанайга, уйкуга, кан айлануунун жакшырышына жана табитти ачууга таасир берет. Аталган азыктардын суткалык орточо нормасы — бир же эки банан, 100 грамм грек жаңгагы жана 200 грамм шпинат. Бул көлөм серотониндин иштелип чыгышы үчүн жетиштүү болот.
