БИШКЕК, 18-май — Sputnik. Орозо айт күнү үйүнө көп адам чакыргандарга да, конокко келгендерге да чара колдонулат. Бул туурасында өкмөттүн Ош облусундагы өкүлү Узарбек Жылкыбаев брифинг учурунда билдирди.
Облус башчысынан Алай районундагы Жошолу айылынын тургуну кошунасы айт күнү эки жылкы союп эл чакырууга камынып жатканын, "мамлекет 60 миң сом айып салса, төлөп коюп өткөрө берем" деп отурганын айтып, аны токтотуунун жолун сурады.
"Ал айып пулду төлөп коём деп өзүнүн байлыгына, мансабына чиренбеш керек да. Жалпы калктын саламаттыгын ойлонушубуз зарыл. Айып пулдун көлөмү 60 миң сом экенин азыр угуп жатам, аны да тактайбыз. Бизде эл чогулбаш керек деген талап бар. Ошондукан буга чакырган тарап гана эмес, келген адамдар дагы жооп берет. Аларга чара көрүүгө мүмкүнчүлүгүбүз бар. Анан суранып кетерим, тууган-урук же кошуналарыңыздар айт күнү чакырып жатса барбай эле үйдөн дуба кылып коёруңузду айтыңыз", — деп кайрылды Жылкыбаев.
Ошондой эле ал облус тургундарын сооп алуу ниети болсо элди үйүнө чакыруунун ордуна, сойгон малынын этин таратып берүүнү сунуштады.
Кыргызстанда быйыл Орозо айт 24-майга туш келери болжолдонууда.
Белгилей кетсек, Ош облусунун 151 тургунунан коронавирус аныкталган. Бүгүнкү күндө анын ичинен 129у айыгып чыкты. Экөөнүн абалы оор, бирөө реанимацияда жатат. Үч бейтап оорунун кесепетинен кайтыш болуп калды. Өткөн суткада облуста беш адамдан COVID-19 чыкты.
Коронавирустун кесепети
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Ушу тапта өлкө аймагында абал кандай болуп жатканын Sputnik жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
