БИШКЕК, 12-май — Sputnik. Өзгөчө абал режими учурунда кызмат өтөгөн укук коргоо органдарынын жана тиешелүү күч түзүмдөрүнүн аскерлерине компенсация төлөнөт. Бул тууралуу премьер-министр Мухаммедкалый Абылгазиев ЖКнын укук тартиби, кылмыштуулук менен күрөшүү жана коррупцияга каршы аракеттенүү комитетинин отурумунда билдирди.
Ал депутаттардын суроолоруна жооп берип жатып буга чейин парламенттин жыйынында "кээ бир милиционерлер кошумча акыдан баш тартууда" деп айткан сөзү туура эмес нукка бурулуп кеткенин белгиледи.
"Тийиштүү мыйзам, өкмөттүн чечимдери бар жана биз аларды аткарабыз. Бул маселе боюнча көйгөй жок. Акча бар", — деди өкмөт башчы.
Ошондой эле Абылгазиев пенсия, айлык акы, жөлөк пул жана башка социалдык төлөмдөрдү берүү боюнча маселе жок экенин кошумчалады.
