БИШКЕК, 10-май — Sputnik. Улуттук банктын төрагасы Толкунбек Абдыгулов валюта рыногундагы кырдаал, бизнести колдоого канча каражат талап кылынары жана өлкөнүн банк тармагындагы жаңы технологиялардын өнүгүшү тууралуу маалымат берди.
Төрага бүгүн өкмөт үйүндө өткөн брифингде билдирүү жасаган. Анын маанилүү учурларын тизмектейбиз:
- валюта рыногундагы кырдаал туруктуу, Кыргызстандын резерви 2 миллиард 394 миллион доллар, бул 4,5 айлык импортко жетет;
- "Керемет банктын" каражатынан 750 миллион сом чакан жана орто бизнеске кредит берүүгө жумшалат. Анын шарттары азырынча белгисиз;
- күрөө менен камсыздоо маселесин чечүү үчүн Кепилдик фондунун капитализациясын 1 миллиард сомго көбөйтөт. Күрөө каражаттары чакан, орто жана ири ишканаларга берилет. Ошол эле учурда артыкчылыктуу тармактарга, региондорго көңүл бурулат;
- Улуттук банк өткөн жылы тапкан 2,5 миллиард сом кирешесинин баарын мамлекеттик бюджетти колдоо үчүн которот. Ал сумманын 10 пайызын каржы секторунун резервин түзүүгө жумшайт;
- жакынкы айларда Улуттук банк тарабынан экономиканы колдоо үчүн сарптаган каражаты 5 миллиард 250 миллион сомду түзөт;
Кыргызстанда жаңы финансылык технологияларды өнүктүрүү колго алынып, накталай эмес эсептер жүргүзүлөт. Эң биринчи кезекте банктар кардарларын аралыктан тейлегендей системаны түзүү пландалууда.
