БИШКЕК, 8-май – Sputnik. Социалдык тармактарда Казакстандын суу каптап кеткен Мактаараль аймагына гумжардам катары жөнөтүлгөн кийим-кечектин чөнтөктөрүн адамдар аңтарып акча издеп жаткан видео популярдуу болууда.
Sputnik Казакстан агенттиги жазганына караганда, жабыркагандарга кол сунуу максатында эски кийимдерин берип жиберген жубайлар күрмөлөрдүн чөнтөгүнүн биринде үч миң доллары бар экенин унутуп калышкан. Алар унаа жүктү алып кетип калгандан кийин гана акчасын эстеп, артынан машина жөнөтүшкөн. Натыйжада акча табылып, ээсине кайтарылды.
Эскерте кетсек, 1-май күнү Өзбекстандагы Сардоба суу сактагычындагы дамбанын бир бөлүгү жырылган. Мындан улам 70 миңге чукул тургун эвакуацияланган. 17 миңден ашык адам медициналык көзөмөлдөн өтүп, 60 адам ар кандай жаракаты менен ооруканага жаткырылган.
Ал эми 2-май күнү суунун агымы Казакстандын Түркстан облусуна жеткен. Төрт айылдын 5000ден ашуун тургуну коопсуз жайга көчүрүлгөн.
