БИШКЕК, 5-май — Sputnik. Жалал-Абадда 1-майдан тарта ишин жанданткан ишканаларга рейд жүргүзүлүп, натыйжада санитардык-эпидемиологиялык талаптарды аткарбаган 10 ишкана кайра жабылды. Бул тууралуу шаардык мэриядан билдиришти.
Маалыматка караганда, 5-май күнү калаа мэри Мураталы Тагаев баштаган жергиликтүү бийлик өкүлдөрү тийиштүү адистер менен биргеликте топ-топко бөлүнүп, ишкердик субъектилерди кыдырышкан. Натыйжада унаа тетиктерин саткан дүкөндөрдө, айрым сулуулук салондорунда милдеттүү болгон санитардык нормалар эске алынбаганы такталган. Буга байланыштуу алар кайрадан жабылды.
Эске салсак, 1-майдан тарта шаардагы 80дей мекеме, ишканага жумушун улантууга уруксат берилген.
