БИШКЕК, 5-май — Sputnik. Нарын районунун Эмгек-Талаа айылынын тургундары кармап алган ак илбирс Ысык-Көл облусундагы NABU реабилитациялоо борборуна жеткирилди. Бул тууралуу мекеменин маалымат кызматы билдирди.
Посмотреть эту публикацию в Instagram
"Ак илбирс Ананьево айылындагы реабилитация борборуна жеткирилди. Көтөрүм болуп, алы кеткен жаныбар автоунаадан питомникке алып түшүп жатканда кыймылдаган жок. Анын абалы ортодон төмөнүрөөк деп бааланып, борбордун адистери көзөмөлдөп жатат. Кечинде бир аз эт жеген, бүгүн эч нерсе жей алган жок", — деп айтылат билдирүүдө.
Алдын ала маалыматтарга караганда, жырткыч картайып ооруп калган жана ветеринардык жардамга муктаж.
Белгилей кетсек, 3-майда жайыттагы музоого тиш салган ак илбирсти жергиликтүү тургундар кармап, бийлик органдарына кабарлашкан. Ал жерге Айлана-чөйрөнү коргоо жана токой чарбасы агенттигинин Өзгөчө корголгон жаратылыш аймактары жана биологиялык ар түрдүүлүктү сактоо департаментинин ыкчам тобу барган.
Ветеринарлар ак илбирсти текшерип эркек экенин жана карып калганын айтышкан. Ошондой эле жырткычтын алсыз, бир буту аксак, көзүнүн көрүүсү начар экени аныкталган. Адистер ак илбирс азыркы абалында аңчылык кылып, тамак таап жей албайт деген чечимге келген.
