БИШКЕК, 2-май — Sputnik. Ош облусунда кичи шаар жана зарыл иш менен бир райондон экинчисине каттаган таксисттерге экиден киши салып иштеген пайдасыз болууда, бирок алар эрежени аткарууга тийиш. Бул тууралуу өкмөттүн Ош облусундагы ыйгарым укуктуу өкүлү Узарбек Жылкыбаев билдирди.
Өкүлгө "район аралык таксилердин ишине уруксат берилгенби" деген суроо узатылган.
"Алардын иши азырынча жандана элек. Район ичинде каттаганда уруксат берилген. Бирок шарттары бар. Унаанын патенти болушу керек, ичин дезинфекция кылып турушу шарт. Ошондой эле эки гана киши отурушу керек. Бизге ал шарт дагы туура келбей турат. Маселен чоң шаарларда канча киши отурса баягы эле бааны төлөйт да. Ал эми бизде бир орунга акча төлөйт. Ошондуктан таксисттер мунун бизге пайдасы жок болуп жатат деп кайрылышууда. Муну алар өздөрү карап көрүшү керек. Бир унаага төрт адам салса, айып бул төлөнөт", — деди Жылкыбаев.
Sputnik Кыргызстан агенттиги өкүлчүлүк менен байланышып, таксилер кайсы жерлерде киши башына акы аларын тактады.
"Ош шаарында тургундар чакырымга жараша төлөйт. Ал эми Өзгөн, Ноокат менен Кара-Суу кичи шаарларынын ичинде, ошондой эле район аралык таксилер киши башына алат. Район аралык таксилердин иши азыр жандана элек. Бирок зарыл жумуштар менен өткөрөбүз. Ошондой убактарда айдоочулар эки киши салган пайдасыз, ичин толтуруп алалы дегендер болду. Бирок биз аларга макул болбой, түшүндүрүү иштерин жүргүздүк", — деп билдирди маалымат катчы.
Белгилей кетсек, 1-майдан тарта өзгөчө абал режими Ноокат, Кара-Суу жана Сузак райондору менен Нарын шаарында токтотулган.
Ал эми Бишкек, Ош, Жалал-Абад шаарлары менен Ат-Башы районунда бул тартип 10-майга чейин узарган.
