БИШКЕК, 30-апр. — Sputnik. Бишкекте автокөлүк жолдон чыгып кетип, жыгач устундарга урунганын "Короче" Telegram-каналы кабарлады. Маалыматты комендатура дагы тастыктады.
Жол кырсыгы бүгүн саат 15:00дөр чамасында Юнусалиев көчөсү менен Скрябин жана Субанбердиев көчөлөрүнүн ортосунда болгон. Видеодон Lexus үлгүсүндөгү унаа каршы тилкеден өтүп, жанындагы автокөлүктөн ашып кетүүгө аракет кылганда жолдон чыгып кеткенин көрүүгө болот.
Башка күбөлөрдүн видеолорунан Lexus жыгач устунга урунганын байкоого болот. Комендатуранын маалыматы боюнча, рулда 1992-жылы туулган Э.Э. болгон. Ал Юнусалиев менен түндүктү көздөй бара жатып унаасын башкара албай калган. Медициналык экспертиза анын мас эмес экендигин аныктаган.
Айдоочу жаракат алып, ооруканага жаткырылган. Жолтандабас айып короого токтотулду. Тергөө иштери жүрүп жатат.
