Ыбышева: дезинфекциялык каражаттарды туура колдонуу маанилүү
Азыркы учурда жууп-тазалоочу каражаттар абдан көп. Бирок аларды туура тандап колдонбосок, жасаган ишибиз текке кетет. Бул тууралуу Бактыгүл Ыбышева Sputnik Кыргызстан радиосуна маек куруп жатып билдирди.
Анын айтымында, башка вирустардан айырмаланып, COVID-19 айлана-чөйрөгө туруктуу келет. Кытай окумуштуулары анын мурун көңдөйүндө 37 күнгө чейин жашап жүрө берерин изилдеп чыгышкан.
"Коронавирустан улам үйлөрдү мурдагыга караганда көп, анан ар кандай каражаттарды колдонуу менен жууп-тазалап калдык. Бул жакшы, бирок ошол колдонуп жаткан каражаттар ар кандай болот. Кээ бирөө темир буюмдарга арналса, башкасы желим же тактайга ылайыкташкан. Сатып аларда мына ушул көрсөтмөлөрүнө көңүл буруу зарыл. Ошондой эле ар кайсы каражат түрдүү ыкмада, температурада сакталышы керек. Кээ бирөө нымдуу, караңгы жерде, башкасы кургак, жарык жерде турушу керек. Кожойкелер көбүнесе жууп-тазалоочу каражаттардын баарын чогултуп бир жерге жайгаштырып коюшат. Мындай учурда сакталган жери туура келбегендери сапатын жоготуп, ал тургай колдонуучуга зыян да алып келиши мүмкүн", — деди Ыбышева.
Дарыгер аллергиясы барлар химиялык жууп-тазалоочу каражаттардан алыс болуп, үйдү кир самындын эритмеси менен, ал эми идиш-аякты сода менен жууса болорун кошумчалады.
