БИШКЕК, 29-апр. — Sputnik. 3-10-майда Дубайдан Бишкекке чартердик рейс уюштуруу маселеси каралып жатат. Бул тууралуу тышкы иштер министринин биринчи орун басары Нуран Ниязалиев маалымат жыйын учурунда билдирди.
Ниязалиев чет өлкөдөн мекенге келүүнү каалап жаткан мекендештердин саны көп болуп жатканын да баса белгиледи.
"Өлкөгө 8000 мекендеш алып келингенине карабастан, мекенге кайтууну каалаган кыргызстандыктар көп. Учурда алар дүйнөнүн 58 мамлекетинде. Тактап айтканда, Европа, Азия, Түндүк Америка, ал тургай Африка өлкөлөрүндөгү мекендештер өлкөгө кайтууну ниеттенип жатканын билдирди. Биздин консул, элчиликтер алар менен ар дайым байланышта болуп турууга аракет кылышат. Алар тууралуу маалымат бар жана тизмеге киргизгенбиз", — деди Ниязалиев.
Кыргызстанда коронавирус жуктуруп алгандардын саны 729га жетти. Анын ичинен 437си айыкса, сегизи каза болгон.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
