Кайра сенден документ сураган "юристирээктер" бар. Кайгуулдагы жоокердин окуялары

Белгилей кетсек, коронавирустан улам өзгөчө абал режими Бишкек, Нарын, Ош жана Жалал-Абад шаарлары, Ноокат, Кара-Суу, Сузак жана Ат-Башы райондоруна киргизилип, анын негизинде коменданттык саат (6.00-21.00) жарыяланган. Күндүз зарыл жактарга гана чыкканга уруксат. Жарандардын эшиктеги кыймылын милиция кызматкерлери менен аскерлер көзөмөлдөйт. Ал эми блокпосттордо унааларды тескеген куралчан аскерлер турары маалым.

Sputnik Кыргызстан маалымат агенттиги Бишкектин көчөлөрүндө кайгуулда турган аскер кызматкери Авазбек Аманбеков менен байланышып, кайгуулдагылардын иши тууралуу билгенге аракет кылды. Белгилей кетсек, аскер тармагы менен спортту айкалыштырган Аманбеков кикбоксинг боюнча дүйнөнүн үч жолку чемпиону. Учурда ИИМдин алдындагы Ички коопсуздук аскер кызматынын курамында.

Аманбеков кайгуулда тургандар ар кандай кулк-мүнөздөгү адамдар менен иш алып барарын билдирди. Ал кызмат учурунда кызыктуу, күлкүлүү, кээде кыжырды келтире турган учурларды айтуу менен жарандарды тартиптүү болууга үндөдү.

1. Жакын басып келип өзүңдү тааныштырып, саламдашып "честь" берсең, шашып кетип, түшүнүп түшүнбөй сага да "честь" берип койгондор болот. Аскердик тартип боюнча баш кийимге колду тийгизип туруп, салам берүү биздин эле милдет.

2. Документин сурасаң оң чөнтөк, сол чөнтөк, төш чөнтөк, шымынын арткы чөнтөгүн, кыскасы болгон чөнтөктөрүн чукулап жатып акыркысынан таап алып чыгып бергендер болот. 

3. Алыстан сени көрө калып документтерин колуна алып, көрсөтүүгө даярданып келе жаткан тың адамдар бар. Мындайлар сүйүндүрбөй койбойт.

4. Жакшынакай эле келе жатып сени көргөндө жумушу чыгып калып шарт бурулуп кеткендер болот.

5. Аны көздөй баратсаң сени көзүнүн кыйыгынан карап, ошол эле учурда байкамаксан болуп, токтотпой эле койсо экен дегенсип өзүнө ишенбей кадам шилтеп келе жаткандарды күн сайын учуратасың.

6. Кээ бирөө жаныңа келгенде же токтоп каларын, же басып кетерин билбей ойлонуп, жалдырап сени карап туруп калат.

7. Сүйлөсөң укпай, кулакчынды баса тагынып алып өзү менен өзү "не до тебя" болуп, "дыкс-дыкс" деп бараткандар кездешет.

8. "Служебный удостоверениеңизди көрсөтүп коюңуз" деген юристирээк адамдарды да жолуктурабыз. Анан өзүнүн документин сурай келсең толук көрсөтө албайт. 

9. Бар документин көрсөтүп баш ийбей, кыларга иши жоктой моюн сунбагандар аягында каршылык көрсөтүү жакшылыкка алып барбай турганын түшүнүп, паспортун чөнтөгүнүн кычыгынан "кокустан" таап алып чыга калышат.

10. Эки нан, кола, чипсыны дүкөндөн көтөрө албачудай болуп ата-эне, баласы велосипед менен, кичине кызы роликчен болуп үй-бүлөсү менен чыгып алышат.

11. Маскасы бар, бирок аны будамайлап сумкасына, чөнтөгүнө салып же колуна кармап алгандар болот.

12. Спорт аянтчаларында үч-төрттөн топтошуп алып, эртең эле олимпиадага барчудай "катуу" көнүгүү жасап жаткандар бар. Таза аба жакшы деңизчи, бирок карантин убагында үйдөн машыгыңыз.