БИШКЕК, 25-апр. — Sputnik. Улуу Британия тургуну, жөнөкөй эле жыгач уста лотереядан утуп, мультимиллионер аталды. Бул тууралуу Daily Mirror басылмасы жазды.
Маалым болгондой, 38 жаштагы Райан Хойл супермаркеттен дайыма лотерея билетин сатып алчу. Коронавирустан улам изоляция режими учурунда ал онлайн режиминде дагы бир ирет ойноп көрүүнү чечет. Кийинчерээк электрондук почтасын текшерсе, 58 миллион фунт стерлинг (70 миллион долларга жакын) утканы тууралуу билдирүү келген.
"Акчаны жалаң өзүмө сарптабайм. Үй-бүлөмө жана жакындарыма жардам бергим келип жатат. Апам жергиликтүү мектептердин биринде пол жууп иштейт. Аны мөөнөтүнөн мурда пенсияга жиберсем сонун болмок", — деген ал.
Хойл лотереядан уткан акчага автоунаа алып, үй салып, кызын Флорида штатындагы "Уолт Дисней" эс алуу борборуна алып барып келерин да кошумчалаган.
