Дарыгер: акыркы бейтап айыгып чыкмайынча үйгө барбайбыз
Республикалык клиникалык жугуштуу оорулар ооруканасында эмгектенгендер коронавирус жуктурган акыркы бейтап айыгып чыкканга чейин үйлөрүнө барышпайт. Бул тууралуу Гүлжигит Аалиев Sputnik Кыргызстан радиосуна маек куруп жатып билдирди.
Анын айтымында, аталган оорукана 22-марттан тарта өзгөчө режимде иштеп жатат.
"Коронавирус жуктурган алгачкы бейтап катталгандан баштап эле оорукана, кызматкерлер дагы өзгөчө режимге өттүк. Учурда бейтапкана COVID-19 вирусуна шектелген жана аны менен ооруп жаткандар менен гана иштеп жатат. Аталган инфекция менен алгачкы бейтап келгенден бери биздин дарыгерлер, медайымдар, санитарлар, деги эле оорукананын бардык кызматкерлери үйлөрүнө барбай, ушул жерде. Эгерде айрым жерлерде дарыгерлер 14 күн иштеп, 14 күн обсервацияда болуп жатса, биздин кызматкерлер акыркы бейтап айыгып чыкканга чейин ушул жерде болушуп, андан кийин гана обсервацияга жатышат. Мына ушунун баары бүткөндөн кийин гана үйлөрүнө барышат. Ошондой эле биздин башка кызматкерлер аймактарга чыгып, көмөк көрсөтүшүүдө. Себеби бул багыттагы жалгыз гана оорукана. Медиктерибиз аймактагы кесиптештерине консультация берип жатат", — деди Аалиев.
Дарыгер ошондой эле COVID-19 инфекциясынан башка жугуштуу оорулар бөлөк ооруканаларга жайгаштырылганын кошумчалады.
