БИШКЕК, 15-апр. — Sputnik. Өлкөдөгү жугуштуу илдеттер ооруканасынын абалы өтө начар, буга чейин такыр каралган эмес. Бул туурасында саламаттык сактоо министри Сабыржан Абдикаримов парламенттин жыйынында билдирди.
Анын айтымында, аталган ооруканада медициналык жабдуу жетишсиз, жада калса рентген аппаратына муктаждык жаралууда.
“Хирургия жана башкалардын абалы жакшы, жугуштуу илдеттер ооруканасы абдан начар болчу. Учурда эл аралык долбоорлор менен иштеп жатабыз. Оорукананы оңдоодон өткөрүп, жабдуулар менен камсыздап, жасалма дем алдыруучу аппараттарды, көчмө рентген алууну пландап жатабыз”, — деди министр.
Мындан сырткары, ал өлкөдө жугуштуу оорулар менен күрөшө турган дарыгерлер жетишсиз экенин мойнуна алды.
14 Чын Куран 2020, 15:37
“Айлыктын азынан бизге жаштар көп келбей жатат. Пенсия курагына жеткен кишилер. Андан тышкары, бизде тогуз лаборатория, 22 эле вирусолог бар. Байкуштар үч график менен иштеп жатышат. Азыр Айыл чарба министрлигинен, Айыл чарба академиясынан вирусологдорду чакырып жатабыз. Мугалимдерди, 6-курстун студенттерин да тарттык”, — деди Абдикаримов.
Суроо берген депутат Карамат Орозова жок дегенде кырдаал турукташканга чейин дарыгерлердин маянасын эки эсеге жогорулатуу керектигин белгиледи.
