БИШКЕК, 15-апр. — Sputnik. Дүйнөлүк саламаттыкты сактоо уюмунун (ДССУ) генералдык директору Тедрос Адханом Гебрейесус Женевада өткөн маалымат жыйын учурунда пандемияга байланыштуу киргизилген чектөөлөр кандай шартта токтотуларын айтты.
"Чектөөлөрдү алып салуу үчүн мамлекеттин өз жарандары бардык коопсуздук эрежелерин карманып жатканына көзү жетиши керек. Ошондой эле бардык байланыштарды көзөмөлдөй алышы зарыл", — деди ДССУ жетекчиси.
Тагыраагы, мамлекет төмөнкү шарттарды так аткарууга тийиш:
- Саламаттык сактоо системасы вирус жуктуруп алган жана аны менен байланышкан бардык жарандарды көзөмөлгө алууга чама-чаркы жетиши керек;
- Оорукана, мектеп сыяктуу мекемелерде жана коопсуз жайларда дени сак адамдар вирус жуктуруп албоо үчүн коопсуздук чаралары көрүлүшү зарыл;
- Өлкөгө сырттан вирус алып келүүгө бөгөт коюлушу кажет.
Жонс Хопкинс атындагы университеттин Системалуу изилдөө жана инжиниринг борборунун сайтындагы маалыматка ылайык, 14-апрелге карата дүйнө жүзү боюнча коронавирус жуктургандардын саны 1 934 583кө жетти. Анын ичинен 120 миңден ашык адам каза болду.
