БИШКЕК, 14-апр. — Sputnik. Жогорку Кеңештин биргелешкен комитеттеринин жыйынында биринчи вице-премьер Кубатбек Боронов Кыргызстандагы өзгөчө абалдын режими дагы 10-15 күнгө чейин узарышы мүмкүн экенин билдирди.
Анын айтымында, кандай чечим кабыл алынса дагы ишкерликтин айрым түрлөрүнө уруксат берүү каралып жатат.
“Аз болгондо дагы 10-15 күнгө узартышыбыз керек болот. Биз президентке мөөнөтү жок эле сунушту бердик. Кийинки кадамдар ал жактан кабыл алынган чечимдерге карата жасалат. Учурда биз тобокелчилиги азыраак бизнестин түрлөрүнө уруксат берүүнү карап жатабыз”, — деди Боронов.
Мындан сырткары, депутат Чыныбай Турсунбеков өзгөчө абалды алып, өзгөчө кырдаал режиминин мөөнөтүн узартууга мүмкүнчүлүк болор-болбосуна кызыкты.
Кечээ Республикалык штаб өлкөдөгү өзгөчө кырдаал жана өзгөчө абал режимдерин узартуу мүмкүнчүлүгүн кароону президентке сунуштаган.
Бишкек, Ош, Жалал-Абад шаарлары менен Сузак, Кара-Суу, Ноокат райондоруна 25-марттан 15-апрелге чейин өзгөчө абал киргизилген. Бул аймактарда саат 20:00дөн 7.00гө чейин көчөгө чыгууга тыюу салынган. Күндүз ооруканага, дарыканага жана дүкөнгө гана барууга уруксат берилет.
