БИШКЕК, 23-мар. — Sputnik. Өзбекстанда коомдук жайларда бет кап тагынбагандар айыпка жыгылмай болду. Бул туурасында Sputnik Өзбекстан агенттиги ыкчам штабына шилтеме берип жазды.
"23-марттан тарта республиканын бардык аймагында маскасы жок жүрүүгө тыюу салынат", — деп айтылган маалыматта.
Ал эми 25-март күнү саат 6:00дөн тарта бул эрежени бузгандар 223 миң сум (1962 сом) төлөйт. Эгер кайрадан эрежени бузса, 669 сумга (5887 сом) айыпка жыгылат.
Белгилей кетсек, Өзбекстанда коронавирус биринчи жолу 15-мартта Франциядан учуп келген аялдан табылган. Соңку маалыматтар боюнча, Өзбекстанда COVID-19 жуктургандардын саны 42ге жетти. Бул өлкөдө да массалык иш-чаралар токтотулуп, ЖОЖдор, мектептер, бала бакчалар жана башка жайлар карантинге жабылган.
