БИШКЕК, 21-мар. — Sputnik. Үч күн ичинде Кыргызстанга чартердик каттам менен чет өлкөдө жүргөн үч миңден ашуун кыргызстандык алып келинет. Бул тууралуу онлайн-брифинг учурунда Жарандык авиация агенттигинин директору Курманбек Акышев билдирди.
Эске салсак, өкмөт коронавирустун жайылып кетишин алдын алуу максатында 20-марттан тарта Кыргызстандагы туруктуу авиакаттамдарды токтоткон.
Мындан улам чет жердеги мекендештерди алып келүү үчүн жергиликтүү жана бир катар чет элдик авиакомпаниялар менен келишим түзүлдү.
"Биз "Аэрофлот", "Уральские авиалинии", "Сибирь", Flydubai жана "Авиа Трафик" компаниялары менен сүйлөштүк. Булар үч күн ичинде бир нече каттамдан аткарып, чел өлкөдөгү мекендештерди жеткирип берет", — деди Акышев.
Маалыматка караганда, эгер үч күн ичинде каалоочулардын бардыгын алып келүүгө мүмкүндүк болбой калса, кошумча каттамдар андан аркы күндөргө дагы киргизилет.
Эске салсак, Дүйнөлүк саламаттыкты сактоо уюму 11-март күнү коронавирус пандемиясын жарыялаган. Учурда дүйнө жүзү боюнча коронавирус жуктургандардын саны 275 миңден ашты. Ал эми Кыргызстанда азырынча 12 адам катталды.
