БИШКЕК, 13-мар. — Sputnik. Германиядан келгенден кийин үй карантинине алынган вице-спикер Аида Касымалиевадан коронавирус табылган жок. Бул туурасында ал Facebook баракчасына жазды.
Белгилей кетсек, бүгүн түндө вице-спикер менен кошо депутат Абдыбек Дүйшалиев жана Жогорку Кеңештин жети кызматкери үй карантинине алынган болчу.
"Анализдин жыйынтыгы боюнча коронавирус табылган жок. Кийинки анализ дагы бир жолу 10-12-күнү жасалат", — деп жазган Касымалиева.
Парламенттик делегация өткөн жумада Германия парламентинин чакыруусу менен Берлин шаарына барган.
Белгилей кетсек, буга чейин Кыргызстан коронавирус кооптуулугу жагынан өлкөлөрдү үчкө бөлгөн. Эки күн мурда Германия биринчи категорияга кошулган. Эми ал жактан же ал аркылуу келген жарандар эки апталык медициналык жайда өтүүчү карантинге алынат.
Ал арада Казакстанда коронавирус жуктурган эки адам аныкталып, алардын Германиядан келгени белгилүү болду.
