БИШКЕК, 10-мар. — Sputnik. Воронцовкадагы санаторий коронавирус жайылган мамлекеттерден келгендер үчүн көзөмөл жайы болбойт. Бул тууралуу Саламаттык сактоо министрлигинин маалымат кызматы кабарлады.
Кечээ коронавирус жайылып жаткан өлкөлөрдөн келгендер Таш-Дөбө айылындагы (мурдагы Воронцовка) санаторийге жайгаштырылышы мүмкүн деген божомол айтылган.
Курортология жана калыбына келтирүү илим-изилдөө институтунун жетекчиси Марат Сагымбаев санаторийде иш мурдагыдай эле жүрүп жатканын айтты.
"Бардык талаптар аткарылып, график боюнча эле иштеп жатабыз. Институтта кырдаал туруктуу, иш өз нугунда", — деди жетекчи.
Ал жергиликтүү тургундар көзөмөл жайынын ачылышына каршы митинг уюштурат деген маалыматты төгүндөдү.
Эске салсак, буга чейин Саламаттык сактоо министрлиги Кыргызстанга коронавирус жуктуруп алган мамлекеттерден келгендерди карантинге жаткыруу үчүн 1404 койка даярдалгандыгын айткан.
