БИШКЕК, 10-мар. — Sputnik. Экономикалык кылмыштуулукка каршы күрөшүү боюнча мамлекеттик кызматы "Исламбек Матраимов кызматка кайра келди" деген маалыматты төгүндөдү.
Буга чейин Facebook тармагынын колдонуучулары Исламбек Матраимов мурдагы кызматына кайра кайтканын жазып, аны талкуулашкан.
"Райым Матраимовдун Финполдо иштеген агасы Исламбек Матраимов эсиңиздердеби? Мекеме аны кызматына кайра кайтарыптыр", — деп жазышкан колдонуучулар.
Матраимов мурда Экономикалык кылмыштуулукка каршы күрөшүү кызматынын алдындагы Коопсуздук жана ички иликтөө башкармалыгынын жетекчиси болуп иштечү.
"2019-жылдын февраль-март айларында Матраимов акы төлөнбөгөн эмгек өргүүгө чыккан. Андан кийин 22-майда өз каалоосу менен кадрлар карамагына кеткен", — дешти Финполдун маалымат кызматынан.
Эреже боюнча адам кызматтан "кадрлар карамагына кетти" деген түшүндүрмө менен алынса, анда ал бир нече убакыт өткөндөн кийин башка кызматка дайындала алат. Финполдун маалымат кызматы Матраимовдун ушул эрежеге таянып кайра кызматка келер-келбесин тактап берүүнү убадалады.
Буга чейин Дастан Бекешев депутат Искендер Матраимовду Жогорку Кеңештин Укук тартиби, кылмыштуулук жана коррупцияга каршы күрөшүү боюнча комитетинин төрага орун басарлыгынан кетүүгө чакырган. Мындай сунушту Финполдо иштеген Исламбек Матраимовго да берген. Буга "Азаттык" радиосунун журналисттик иликтөөсүндө айтылган материалдар себеп болгон.
Иликтөөдө чет өлкөгө чыгарылып кеткен ири суммадагы каражаттар бир тууган Матраимовдорго тиешеси бар экени айтылган. Ал эми өкмөт башчы Мухаммедкалый Абылгазиев журналисттик иликтөөдө айтылган фактыларды тыкыр текшерүүнү тапшырган.
