БИШКЕК, 9-мар. — Sputnik. Японияда карантинге алынган Diamond Princess лайнеринде жүрүп Кыргызстанга келген кыргызстандык жигиттин тапшырган анализи таза чыгып, вирус аныкталган жок. Бул тууралуу Саламаттык сактоо министрлигинен кабарлашты.
Маалыматка караганда, ал 14 күндүк карантинге алынды. 13 күн өткөндөн кийин кайрадан анализ тапшырат.
Кыргызстандык жигит борбор калаага Япониядан бүгүн, 9-мартта, келген.
Белгилей кетсек, 3 700 туристи бар кеме коронавирустан улам 5-февралда Япониянын Иокогама портуна токтоп, карантинге алынган болчу.
Лайнердеги кыргызстандык жигит төрт ирет анализ тапшырган. Үчүнчүсүндө коронавирус жуктурганы аныкталган. Бирок төртүнчү жолу тапшырган анализи таза чыгып, Токиодогу ооруканадан чыгарылган.
Sputnik Кыргызстан агенттиги буга чейин жигиттин өзү менен байланышка чыгып маектешкен.
