БИШКЕК, 2-мар. — Sputnik. Японияда токтоп турган Diamond Princess лайнериндеги кыргызстандыктан алынган төртүнчү тест жаранда коронавирус жок экенин аныктады. Бул тууралуу өкмөттөн билдиришти.
Буга чейин тышкы иштер министринин орун басары Нурлан Абдрахманов 26-февраль күнү лайнердеги кыргызстандык жигиттен коронавирус аныкталганын билдирген. Вирус бар экени үчүнчү тесттен кийин билинген. Ал эми мурда тапшырган эки тест таза чыккан. Жаран Япониядагы ооруканалардын бирине жаткырылган болчу.
"Японияда токтоп турган лайнердеги кыргызстандыктан кайрадан, төртүнчү ирет тест алышкан. Анын жыйынтыгы таза чыкты. Биздин мекендеш ооруканадан чыгарылып, учурда Токиодо жүрөт", — деп айтылат маалыматта.
Буга чейин кыргызстандык жигит Sputnik агенттигине маек берип, дене табы көтөрүлбөгөнүн жана жөтөл дагы жок экенин билдирген.
