БИШКЕК, 28-фев. — Sputnik. 12-февраль күнү Сокулук районунун аймактык ооруканасына Тез жардам кызматы денеси күйүп калган 42 жаштагы М.О. аттуу келинди алып келген. Бейтап бир күндөн кийин жандандыруу бөлүмүнөн көз жумган. Бул тууралуу Чүй облустук ички иштер башкы башкармалыгынан билдиришти.
Маалыматка караганда, келиндин М.А. аттуу жолдошу түшкө жуук үйүнө мас болуп келип, тамак жасап берүүсүн айткан. Бир маалда "тезирээк жасабайсың" деп ачууланып, желим бөтөлкөдө турган бензинди жубайынын үстүнө чачып жиберген.
"Бол эле бол деп шаштырып газды иштеткенде аялына от жармашып, денеси күйүп калган. Жабырлануучу ооруканага жеткирилип, бир күндөн кийин каза болгон", — дешти милициядан.
Окуя боюнча топтолгон маалыматтар Сокулук РИИБинде Кылмыш жана жоруктардын бирдиктүү реестрине каттоого алынып, сотко чейинки өндүрүш башталган. Анын алкагында шектүү катары келиндин 46 жаштагы жолдошу колго түштү. Тергөө амалдары уланууда.
